Түбән Кама шәһәрендә мөхтәсибәт ярдәме белән мохтаҗларга ярдәм итү үзәге ачылды. “Ихлас” дип исемләнгән павильон шәһәрнең Үзәк базарында урнашкан. Аны эзләп табуы авыр түгел, аның янәшәсендә – трамвай тукталышы. Бирегә теләгән һәр мохтаҗ кеше килеп, ярдәм сорый ала. Әлеге пунктта беренче чиратта кирәк булган әйберләр буенча мәгълүмат җыела: килгән кешедән ашау-эчү, кием, төн кунуга булган мохтаҗлыгы сорала. Җыелган мәгълүмат волонтерлар һәм изге кешеләрнең көчен дөрес бүлү мөмкинлеген бирә. Пункт атнасына өч көн (дүшәмбе, чәршәмбе, җомга) иртәнге уннан көндезге уникегә (10.00-11.30) кадәр эшли.
Белешмәләр өчен телефон: +7 927 438-76-43.
Мохтаҗларга азык-төлек ярдәме күрсәтү ТР мөселманнары Диния нәзарәтенең өстенлекле эш юнәлешләреннән санала. Мисал өчен, әлеге тәҗрибәне Нәзарәтнең “Зәкят” хәйрия фонды, Норлат һәм Чистай мөхтәсибәтләре тормышка ашыра. Норлат мөхтәсибәте көн саен – 70, Чистай мөхтәсибәте 55 кешегә кайнар аш тарата.
