Бүген, җөмәдәл-әүвәл аеның 16нчы көнендә (20нче декабрьдә), Россия ислам институтында мөселман уку йортлары студентлары арасында ислам фәннәре һәм гарәп теле буенча Бөтенроссия олимпиадасы ачылды.
Олимпиадада Татарстан, Дагыстан, Чечня, Карачаево-Черкесия, Башкортстан, Ингушетия республикаларыннан барлыгы 20-дән артык уку йорты вәкилләре катнаша.
Олимпиада Коръән аятьләре укып һәм дога кылып, Татарстан мөфтиенең мәгариф буенча урынбасары, РИИ һәм КИУ ректоры Рәфикъ хәзрәт Мөхәммәтшинның сәламләү сүзләре белән башланды.
“Олимпиадада иң мөһиме – ул ярышу рухы. Без беләбез ки, бирегә иң яхшы шәкертләр җыелды, сез үзегезнең белем дәрәҗәгезне нәкъ бүген күрсәтә аласыз. Быел мөхтәрәм кунаклар сыйфатында БГӘ делегациясе килде. Алар безнең студентларның белем дәрәҗәсе белән кызыксына. Без Мөхәммәд бин Зәйед исемендәге гуманитар фәннәр университеты (Әбу Даби) белән Россия ислам мәгарифе Советы кысаларында хезмәттәшлек алып барырга ниятлибез. Барыгызга да уңышлар телим, Аллаһы Тәгалә белем һәм көч бирсен”, – дип җиткерде Рәфикъ хәзрәт Мөхәммәтшин.
Аннары олимпиадада катнашучылар биремнәрне эшләүгә күчте. Тест биремнәренең бер өлеше заманча технологияләрне кулланып онлайн режимда үтте – бу исә автомат рәвештә нәтиҗә ясарга мөмкинлек бирә.
Өйлә намазыннан соң жюри катнашучыларның телдән чыгышларын бәяләде. “Гарәп теле” номинациясендә катнашучы студентлар гарәп телендә аралашу күнекмәләрен күрсәттеләр һәм жюри сорауларына җавап бирделәр. Моннан тыш, “Ислам фәннәре” номинациясендә катнашучылар шулай ук Коръәнне матур һәм дөрес укуда көч сынаштылар.
Олимпиадада җиңүчеләр иртәгә Халыклар дуслыгы йортында узачак бүләкләү тантанасында билгеле булачак.
