Бүген Татарстан мөфтие Камил хәзрәт Сәмигуллин Казанның “Кол Шәриф” мәчетендә халыкны кабул итте. Ике сәгать дәвамында мөфти дин кардәшләребез белән аралашты. Алар аңа теләк-тәкъдимнәре һәм үтенечләре белән мөрәҗәгать итте. Нигездә бу мәсьәләләр татар халкының дини һәм тарихи мирасын саклау белән бәйле иде. Халыкны кабул итүдә мөфтинең беренче урынбасары Илфар хәзрәт Хәсәнов та катнашты.
КФУда медицина юнәлеше буенча белем алучы Омар Хөсәен мөфтигә Идел буе Болгар дәүләте тарафыннан исламны рәсми рәвештә кабул итү уңаеннан 3D форматындагы интерактив проект тәкъдим итте. Ул борынгы Болгар шәһәренең туристик төрлелеген ачып бирә. Ә журналист Станислав Назаров әлеге юбилей нисбәтеннән ике серияле документаль фильм төшерү идеясен җиткерде. Әлеге фильм «Россия-24» федераль каналында һәм Ютубта күрсәтеләчәк. Алтмыш минутлык 2 серияле фильм дини лидерлар, дин галимнәре, тарихчылар, Татарстанның һәм Иракның борынгы шәһәрләрендә яшәүчеләрнең әңгәмәләренә нигезләнер дип көтелә. Бу фильм кешеләрне берләштергән, тормышларына ямь өстәгән һәм тормышларын үзгәрткән дин турында бәян итә.
Халыкны кабул итү вакытында мөфти хәзрәт шулай ук Казан рәссам-хаттаты Гөлназ Исмәгыйлева-Гатиатуллина белән очрашты һәм аның Ислам мәдәнияте музеендагы «Илаһи сүз хозурында» дигән күргәзмәсен карады. Күргәзмәдә тәкъдим ителгән эшләр 2013-2021 елларда иҗат ителгән. Гөлназ Исмәгыйлева-Гатиатуллина төрле өслүбләрдәге һәм техникалардагы матур язу осталыгын күрсәтә. Әсәрләрнең эчтәлеге нигездә дини, фәлсәфи характерда. Мөфти хәзрәт хаттатның эшләрен бик кызыксынып карады.
Татарстан мөфтие халыкны “Кол Шәриф” мәчетендә кабул итә. Язылу өчен телефон: +7 (843) 237-94-53.
