Бүген, Раҗәб аеның 9нчы көнендә (10нчы февральдә), Татарстан мөфтие Камил хәзрәт Сәмигуллин режиссер, «Сириус» белем бирү үзәгенең сәнгать җитәкчесе, Россиянең Зур театры генераль директоры киңәшчесе Ханс-Йоахим Фрай белән очрашты. Очрашуда шулай ук “Хәләл планета” компаниясен гамәлгә куючы, “Хәләл” индустрия милли ассоциациясе башкарма директоры Радик Гафуров катнашты.
Камил хәзрәт Сәмигуллин кунакка Нәзарәтнең “Хозур ТВ” мөселман телевидениесе, “Азан” радиосы эшчәнлеге, Идел буе Болгар дәүләтендә Ислам динен кабул итүнең 1100 еллыгы бәйрәм итү барышы турында сөйләп узды. Моннан тыш, кунаклар Камил хәзрәт тарафыннан мөфтиятнең яшьләр белән эшләү, хәйриячелек, спорт, динара мөнәсәбәтләр өлкәсендәге казанышлары белән танышып узды. Ислам мәдәнияте һәм Татарстан мөселманнары яшәеше турында тулы, кызыклы мәгълүмат биргәне өчен Ханс-Йоахим Фрай Татарстан мөфтиенә зур рәхмәтләрен белдерде. Мөфти кунакка истәлек итеп “Кәлам Шәриф. Мәгънәви тәрҗемә” басмасын бүләк итте.
Бүген «Сириус» белем бирү үзәгенең сәнгать җитәкчесе, Россиянең Зур театры генераль директоры киңәшчесе Ханс-Йоахим Фрай шулай ук Татарстан Республикасы Президенты Рөстәм Миңнеханов белән очрашты. Очрашуда мәдәни проектлар өлкәсендә хезмәттәшлек итү мәсьәләләре каралды.
