Казанда мәгърифәтче, педагог, татар дин галиме Галимҗан Барудиның «Әл-Әрбәгинәт әл-мутәсәлсилә» хезмәте хәзерге заман татар теленә тәрҗемә ителеп басылып чыкты. Китап хәдисләр җыентыгы булып тора һәм Казанның “Иман” нәшриятында «Бер-бер артлы килүче кырыгар хәдисләрдән торган беренче китап» исеме астында басылды. Оригиналь хезмәт үзе өч китаптан тора.
Хезмәт Галимҗан Барудиның тууына 165 ел тулу уңаеннан Апанай мәчете имам-хатыйбы, тарих фәннәре кандидаты Нияз хәзрәт Сабиров тарафыннан тәрҗемә ителде һәм кайбер хәдисләргә аңлатмалар бирелде. Китапта барлыгы 160 хәдис урын алган. Беренче җыентыктагы хәдисләр шәех Габдерауф әл-Мәнәвинең «Кәнзү әл-хәкаики фи хәдиси хайри әл-халяики» («Иң хәерле мәхлукның хәдисендә хакыйкатьләрнең хәзинәсе») исемле китаптан һәм шәех Җәләледдин әс-Суютыйның «Җәмигъ әс-сәгыйр» («Кечкенә җыентык») исемле китабыннан сайланып алынды. Китап беренче сыйныфларда укучы шәкертләр өчен әзерләнде. Бөтен хәдисләр кыска, аңлау һәм ятлау өчен җиңел. Китапны Апанай мәчетендә сатып алырга мөмкин.
