РФ Мөселман эшмәкәрләре ассоциациясе хәйрия фонды мохтаҗлар өчен 45 литр бал тапшырды: ТР мөселманнары Диния нәзарәтенең «Зәкят» хәйрия фонды мохтаҗларына - 30 литр бал һәм «Мөхәммәдия» мәдрәсәсендә 15 литр бал бирелде.
Татлы күчтәнәчне Татарстан авылларындагы мөселман эшмәкәрләре һәм хәзрәтләр әзерләде. Хәзрәтләр, «Авылларга ярдәм» проекты кысаларында аз керемле гаиләләр өчен азык-төлек җыелмаларын кабул итеп алып, рәхмәт йөзеннән, казанлыларга бал тапшыруны сорады. РФ Мөселман эшмәкәрләре ассоциациясе президенты Айдар Шаһимәрданов билгеләп үткәнчә, хәйрия эшчәнлеге Татарстан районнарында гына түгел, шәһәрләрдә дә алып барыла. «Без «Зәкят» фонды һәм мәдрәсә белән күп еллар хезмәттәшлек итәбез, - дип сөйли Айдар Равил улы. - Аллаһы Тәгалә теләге белән мохтаҗларга ярдәм күрсәтүне дәвам итәрбез дип өметләнәбез».
Узган айда РФ Мөселман эшмәкәрләре ассоциациясе фонды тарафыннан 1 100 000 сумнан артык акча җыелган һәм бүленгән. Бу акчалар ислам мәгарифенә һәм фәненә, мәчетләр төзүгә ярдәм итүгә, сәүдә үзәкләрендәге намаз уку бүлмәләрен тотуга җибәрелгән.
