Бүген, Шәгъбән аеның 21нче көнендә (24нче мартта), өйлә намазыннан соң Казанның Тынычлык мәчетендә күп хөрмәт казанган дин кардәшебез, Россия һәм Татарстан данын халыкара мәйданда күп тапкырлар яклаган, күпсанлы мөселман спортчыларын тәрбияләгән тренер Айрат Кәлимуллин белән хушлашу чарасы узды. Мәрхүмгә җеназа намазын мөфти Камил хәзрәт Сәмигуллин укыды. Айрат Дамир улы белән хушлашырга аның күпләгән шәкертләре, дин әһелләре, җәмәгать эшлеклеләре, спортчылар, мәхәллә халкы килгән иде. Алар мәрхүм хакында җылы истәлекләре белән бүлештеләр, гаиләсенең һәм якыннарының кайгысын уртаклаштылар.
Айрат Дамир улы Кәлимуллин Тынычлык бистәсе зиратына җирләнде. Ахырдан Коръән сүрәләре укып, җыелган халык мәрхүмнең гөнаһ, хата-кимчелекләре кичерелүен, мәңгелек урыны оҗмах түрләрендә насыйп булуын сорап дога кылды. Исегезгә төшерәбез, танылган тренер, каты авырудан соң, кичә бакыйлыкка күчте.
Моңа кадәр Татарстан мөселманнары Диния Нәзарәте һәм РФ мөселман эшмәкәрләре ассоциациясенең хәйрия фондлары Айрат Кәлимуллинга дәвалану өчен акча җыйган иде. Ул җитди авыру – 4нче дәрәҗәдәге яман шеш (рак простаты 4 степени) белән Бакудагы махсус онкология клиникасында (Центр ядерной медицины) көрәште. Игелекле кешеләрнең ярдәме белән өч курсны узу өчен акча җыелган иде. Айрат Дамир улы ике курс үтәргә өлгерде. Нәзарәтнең “Зәкят” хәйрия фонды карары белән калган акчалар аның гаиләсенә тапшырылды.
