Бүген, Рамазан аеның 11нче көнендә (12нче апрельдә), Татарстан мөфтияте һәм Казан епархиясе Донецк һәм Лугансктан килеп, Сәет-Галиев урамындагы “Экспресс” вакытлыча урнашу урынында тукталган качакларга гуманитар ярдәм күрсәтте. Нәзарәтнең “Зәкят” хәйрия фонды Казан шәһәренә килгән качакларга 5 тартмага тутырылган көндәлек кирәк-яракларын тапшырды. Хәйрия ярдәме 100гә якын комплект шәхси гигиена әйберләре һәм көнкүреш химиясе әйберләреннән һ.б. гыйбарәт.
Качаклар белән Казан шәһәренең баш мөхтәсибе Рөстәм хәзрәт Вәлиуллин, Нәзарәтнең “Зәкят” хәйрия фонды җитәкчесе Булат Мәрданов, шулай ук Епархиянең социаль бүлек җитәкчесе иерей Сергий Петров һәм Рус Казысы храмы настоятеле иеромонах Силуан аралашты, аларның яшәү шартлары һәм дин тоту өчен тудырылган мөмкинлекләр белән танышты. Качаклар дин әһелләренә ярдәмне оештырган өчен рәхмәтләрен белдерделәр.
Качаклар белән очрашуларны дәвам иттерү көтелә, киләсе күрешү иртәгә чираттагы вакытлыча урнашу урынында үткәреләчәк. Казан шәһәрендә 4 вакытлыча яшәү урыннарына урнашкан 500гә якын кеше бар. Үткән атнада “Кварт” кунакханәсенә урнашкан качакларга ярдәм күрсәтелде.
