Бүген, Рамазан аеның 20нче көнендә (21нче апрельдә), Татарстан мөфтиятендә РФ Саклык банкының исламча финанслау һәм махсус проектлар үзәге башлыгы Бехнам Гурбан-Заде булды. Кунакны Татарстан мөселманнары башлыгы, мөфти Камил хәзрәт Сәмигуллин кабул итте.
Аның белән бергә очрашуда шәригать мәсьәләләре буенча бүлек җитәкчесе, Казан шәһәре казые, Нәзарәтнең Голәмәләр шурасы әгъзасы Булат хәзрәт Мөбарәков та катнашты.
Эшлекле очрашуда Бехнам Гурбан-Заде ислам финанс продуктларының 6 төрен эшләтеп җибәрү планнары турында сөйләде һәм хәзрәткә аларны шәригать таләпләренә туры килү-килмәүне өйрәнү үтенече белән мөрәҗәгать итте. Гурбан-Задә сөйләгәнчә, ислам финанс продуктлары корпоратив һәм ваклап сату клиентлары өчен эшләнгән (счетлар ачу, лизинг, финанслау, сәүдә-финанслау һ.б.).
Камил хәзрәт кунакка Россиядә ислам финансларын үстерүгә керткән башлангычлары өчен рәхмәтен белдерде һәм Нәзарәтнең Голәмәләр шурасы әгъзасы, AAOIFI ислам финанслары өлкәсендә сертификацияләнгән белгеч Булат хәзрәт Мөбарәковка банкның яңа проектларын өйрәнү һәм аларны ислам кануннарына туры китерү мөмкинлеген карарга кушты. Камил хәзрәт шулай ук Булат хәзрәтне әлеге продуктларны тормышка ашыру буенча тышкы шәригать консультанты итеп билгеләде. Аудит узгач һәм шәригать стандартларына туры китерелгәннән соң, продуктлар Нәзарәтнең Голәмәләр шурасында фикер алышуга һәм “Хәләл” тамгасы белән куллануны хуплау өчен тәкъдим ителәчәк.
