Бүген, Рамазан аеның 25нче көнендә (26нчы апрельдә), Нәзарәттә мөфти Камил хәзрәт Сәмигуллин Татарстан Республикасы Мәдәният министры урынбасары Ленар Хәкимҗанов белән очрашты. Очрашуда сүз Ислам динен кабул итүнең 1100 еллыгы уңаеннан Татарстан мөфтияте һәм Мәдәният министрлыгы белән бергәлектә үткәрелүче чаралар турында барды. Җитәкчеләр 1100-еллыкны бәйрәм итү, чаралар уздыру, аерым алганда, 19-21 май көннәрендә Казан һәм Болгар шәһәрләрендә көтелгән зур тантаналарның программасын карады.
Май аенда Татарстанда Ислам динен кабул итүнең 1100 еллыгы уңаеннан күпләгән мәдәни чаралар узуын искәртеп, Камил хәзрәт министр урынбасарына Казанда Җәмигъ мәчете төзелеше башланачак урынга таш кую чарасы, Изге Болгар җыены һ.б. тантаналарны уздыру буенча тәкъдимнәрен җиткерде. Ленар Хәкимҗанов барлык киңәшләре өчен Мөфтигә рәхмәтләрен җиткерде, очрашуда яңгыраган тәкъдимнәрнең бәйрәмне уздырганда искә алыначагына өметен белдерде.
