Бүген, Казанның “Кол Шәриф” мәчетендә Татарстан имам-мөхтәсибләре, аксакаллар, имамнар һәм халык катнашында җомга көнне вафат булган Берләшкән Гарәп Әмирлекләре Президенты шәех Халифә бән Зәид Әл Нәхайян рухына дога кылу мәрасиме үткәрелде. Мәрхүмгә хафизлар тарафыннан Коръән хәтем кылынды һәм аның рухына багышлап дога кылынды. Дин әһелләре Аллаһы Тәгаләдән вафат булган шәехның мәңгелек урыны җәннәттә булуын, рухы шат булуын, гөнаһ, хата-кимчелекләрен гафу итүен сорадылар.
Кичә мөфти кайгы уртаклашу сүзләрен Берләшкән Гарәп Әмирлекләренең тәхеткә утырырга тиешле принц һәм бүгеннән Президент итеп сайланган Мөхәммәд бән Зәед Әл-Нәхаянга һәм БГӘнең Россиядәге Гадәттән тыш һәм Тулы вәкаләтле илчесе Мөхәммәд Әхмәд Әл Җаберга юллады.
