Узган ял көннәрендә Әлмәт районының Габдрахман авылының боз сараенда мөселманнар арасында алкалы хоккей буенча республика турниры узды. Чараны Әлмәт районы мөхтәсибәте оештырды. Ярышларда Арча, Әлмәт, Казан, Кукмара, Яр Чаллы һәм Түбән Камадан 100дән артык һәвәскәр спортчы катнашты. Чараның төп максаты хоккей буенча көчле команданы ачыклау, танышу, туганлык элемтәләрен ныгыту, мөселман спортчылар арасында тәҗрибә уртаклашу иде.
Әлмәт мөхтәсибәтенең оештыру бүлеге җитәкчесе Марсэль Рәхимов, турнирны ачып җибәреп һәм ярышларда катнашучыларны сәламләп, Мөхәммәд пәйгамбәрнең ﷺ “Көчле мөэмин Аллаһ каршында көчсез мөэмингә караганда күпкә сөеклерәк” дигән хәдисен искә төшерде. Ул шулай ук ул турнирны оештыруда һәм үткәрүдәге ярдәмнәре өчен Әлмәт районы муниципалитетына, Габдрахман авыл җирлегенә һәм яңа боз сараен төзеткән спонсор Шәфәгать Тәхауетдиновка рәхмәт белдерде
Турнир хоккей уенының гамәлдәге кагыйдәләре буенча узды. Хоккейчылар тиз йөрешле уен, һөҗүм итә һәм саклана белүләрен күрсәттеләр. Нәтиҗәдә, Яр Чаллы командасы җиңүче булды, икенче урында - Түбән Кама командасы, өченчедә - Кукмара командасы. Турнир җиңүчеләре һәм призерлары призлар белән бүләкләнде.
