Узган ял көннәрендә, Халыкара күлләрне чистарту көнендә, Рус география җәмгыятенең Татарстан Республикасындагы төбәк бүлекчәсе Казан янындагы Тирән күлдә экологик өмә оештырды. Анда ТР мөселманнары Диния нәзарәте активистлары да катнашты. Акция барышында яшь мөселманнар күл ярларыннан чүп-чар җыйды һәм төбәк клубларына су төбен чистартырга булышты.
Акциядә барлыгы 350 дән артык кеше катнашты. Алар 7 кубометрдан артык чүп җыйды. Өмәдә катнашучылар - 62000 квадрат метр мәйданда коры җирне, ә дайверлар 7000 квадрат метр мәйданда су төбен чистартты.
Өмәдә катнашучыларны ТР Экология һәм табигый ресурслар министры Александр Шадриков Эколог көне белән котлады, активлыклары һәм әйләнә-тирә мохиткә битараф булмаулары өчен рәхмәт белдерде. Министр билгеләп үткәнчә, татарстанлылар барлык табигать саклау чараларына һәрвакыт теләктәшлек күрсәтә һәм өмәләрдә катнашучылар саны елдан-ел арта бара.
