Ульяновск өлкәсенең төбәк Диния нәзарәте Димитровград шәһәренең 3 нче һәм 10 нчы төзәтү колонияләрендә җәза үтүче мөселманнарга «Хозур» нәшрият йорты бастырган дини әдәбият тапшырды. Бу хакта дини оешма үзенең Telegram-каналында хәбәр итә.
“Аллаһы Тәгалә рәхмәте, Ульяновск өлкәсе мөселманнары тырышлыгы белән, Ульяновск өлкәсе төбәк Диния нәзарәте һәм Җәзаларны үтәтү буенча федераль хезмәтнең Ульяновск өлкәсе буенча идарәсенең килешеп эшләве аркасында, акча җыелды һәм (ТР мөселманнары Диния нәзарәтенең “Хозур” нәшрият йортыннан) традицион дини әдәбият сатып алынды. Бу әдәбият төзәтү учреждениеләре белән эшчәнлек өчен җаваплы имам-хатыйблар тарафыннан Димитровград шәһәренең 3 нче һәм 10 нчы төзәтү колонияләрендә җәза үтүче мөселманнарга тапшырылды. 520 данәдәге әдәбият төрле эчтәлектәге китаплардан (Изге Коръән, гакыйдә, әхлак, хәдис, фикһ һ.б.) торган комплектларга тупланды”, - диелә хәбәрдә.
