Бүген, зөкагъдә аеның 19 көнендә (18 июньдә), Ульяновск шәһәрендә Федераль Сабан туеның икенче көне узды. Бәйрәм кунаклары өчен иртүк концерт программасы, күргәзмәләр һәм сату нокталары, төрле халыклар мәдәниятен чагылдырган утарлар оештырылды, шулай ук бүген көрәш ярышлары булды.
Сабан туена Россиянең төрле почмакларыннан милләттәшләр җыелган, алар арасында - төрле дәрәҗәдәге җитәкчеләр, мөфтиләр, дин, дәүләт, сәясәт, җәмәгать, мәдәният эшлеклеләре, артистлар, спортчылар. Мисал өчен, мәртәбәле кунаклар буларак Сабан туенда Татарстан Президенты Рөстәм Миңнеханов, Россиянең баш мөфтие Тәлгать хәзрәт Таҗетдин, Татарстан мөфтие Камил хәзрәт Сәмигуллин да катнашты.
