Бүген, зөлкагъдә аеның 22нче көнендә (21нче июньдә), Татарстан мөфтие Камил хәзрәт Сәмигуллин “Кол Шәриф” мәчетендә чираттагы халык кабул итү көнен уздырды.
Ике сәгатьтән артык вакыт дәвамында мөфти белән шәхсән очрашуга төрле яшьтәге, төрле һөнәр кешеләре килде. Алар арасында дин әһелләре, җәмәгать эшлеклеләре, гап-гади мәхәллә кешеләре бар иде. Очрашуда катнашучылар Камил хәзрәткә шәхси үтенеч-гозерләрен ирештерде, дини сорауларын бирде. Язылып килүчеләр арасында мөселман уку йортларына укырга керү тәртипләре, Лаеш районы Яңа Сокуры бистәсендә яңа мәчет төзү мәсьәләләре, “Хозур-ТВ” мөселман телеканалы эшчәнлеге буенча кызыксынып мөрәҗәгать итүчеләр булды. Шулай ук дин кардәшләребез мөфти хәзрәтнең чираттагы дәресләренең үткәрелү урыны һәм вакыты белән кызыксынды. Һәрбер сорау һәм тәкъдимнәр җентекләп өйрәнү өчен Нәзарәт һәм аның карамагында эшләүче оешмаларның җаваплы вәкилләренә тапшырылды.
Шунысын билгеләп үтәргә кирәк, мөфтинең халык белән очрашулары атна саен үткәрелә. Язылу өчен телефон: +7 (843) 237-94-53.
