Татарстан Диния Нәзарәте олы югалту кичерә: безнең арадан мөхтәрәм дин әһеле, Лаеш районының хөрмәтле имам-мөхтәсибе Рәүһәт хәзрәт Гатауллин китеп барган. Аның бөтен тормышы Аллаһ юлында була. Республикабызда динебезнең асыл кыйммәтләрен таратуга ул гомеренең күп елларын багышлаган: башта Мамадышта 12 ел мөхтәсиб булып хезмәт иткән, аннан 22 ел буе Лаешта ислам үсеше өчен тырышлыклар куя.
Хөрмәтле җәмәгать! Рәүһәт хәзрәт Яралтучыбызның рәхмәтләренә һәм ризалыгына ирешсен, Раббыз аның игелекле хезмәтләрен кабул әйләсен, дип чын күңелдән теләп калам һәм барыгызны да хәзрәтнең рухына дога кылырга чакырам. Аллаһы Тәгалә хәзрәтне рәхим-шәфкатеннән ташламасын, урынын оҗмахтан итсен иде, дип сорыйк. Амин.
Диния Нәзарәте һәм шәхсән үземнән чын күңелдән мәрхүмнең якыннарының һәм туганнарының тирән кайгысын уртаклашам. Аллаһы Тәгаләдән аларга зур югалтуны күтәрергә ярдәм, сабырлык һәм ныклык бирүен сорыйбыз.
إنا لله وإنا إليه راجعون
“Без Аллаһыдан килгәнбез һәм Аллаһыга кайтачакбыз”.
Татарстан мөфтие Камил хәзрәт Сәмигуллин
