Зөлхиҗҗә аеның 23нче көнендә Чистай мөхтәсибәтенең “Нур” мәчете янәшәсендә мәетханә төзелеше башланып китте. Әлеге корылмага нигез ташы салу тантанасына Чистай шәһәренең барлык мәчетләреннән имамнар җыелды. Район имам-мөхтәсибе Мөхәммәд хәзрәт Кыямов, Чистай мөхтәсибәтендә бердәнбер булган мәетханәнең бүгенге көн таләпләрен исәпкә алып, халык соравы буенча төзелүен билгеләп үтте. Аннары ул Коръән укып, дога кылды. Мәетханәне 2023 ел башына кулланылышка тапшыру көтелә, аның якынча мәйданы 300 квадрат метрны тәшкил итә. Мәетханә Вахит урамы, 43нче йорт адресы буенча урнашкан.
“Күп кенә кешеләр якыннары вафат булгач, югалып калалар яки үлгән кеше ялгыз яшәгән була һәм аның туганнарына мәетне тиешенчә соңгы юлга озату авырга килә. Шуңа күрә шәригать кушканча итеп кешене соңгы юлга озату өчен махсус урын булдыру бу авырлыкларны бераз киметер иде. Әлеге мәетханәдә мәрхүмне юу, кәфенлеккә төрү, җеназа намазы укып озату мөмкинлекләре тудырылачак”, – дип ассызыклап үтте Чистай мөхтәсибе Мөхәммәд хәзрәт Кыямов.
