Бу көннәрдә Татарстан мөфтие Камил хәзрәт Сәмигуллин эш визиты белән Кырымда булды. Ул Кырым татарлары мөфтие Әмирали хаҗи Аблаев чакыруы буенча, Симферопольдә мөхтәрәм мөфтинең 60 яшьлек юбилее уңаеннан уздырылган чараларда катнашты.
Симферопольнең Концерт залларының берсендә Кырым Республикасы башлыгы Сергей Аксенов катнашында кичә узды. Әмирали хаҗины котлауларга Татарстан Президенты Рөстәм Миңнеханов та кушылды, ул мөфти Камил хәзрәт Сәмигуллин аша изге теләкләрен юллаган иде.
Мөфти хәзрәт тантаналы юбилей кичәсе барышында Әмирали хаҗига Рөстәм Нургалиевич Миңнехановның тәбрикләү сүзләрен җиткерде һәм аны үз исеменнән котлады.
– Күпьеллык ару-талуны белмәс эшчәнлегегез Кырымда ата-бабаларыбызның бай рухи мирасын, ислам традицияләрен һәм дини мәгарифне саклауга сизелерлек өлеш кертә, ә сез үзегез илебезнең мөселман җәмәгатьчелегендә зур абруй казандыгыз, – дип, Камил хәзрәт Рөстәм Миңнехановның котлавын укыды һәм үзеннән Әмирали хаҗины тугандаш кырымтатар халкының рухи лидеры дип атады, аңа барлык изге ниятләрендә, эшләрендә һәм башлангычларында уңышлар теләде.
Шулай ук кичә барышында катнашучыларга Кырым мөфтие Әмирали хаҗи Аблаевка багышланган документаль фильм күрсәттеләр.
Юбилей чаралары кунаклары Кырым мөфтие белән бергә борынгы “Хан Җәмигъ” мәчетендә җомга намазында да катнашты.
