Бүген - рабигыль-әүвәл аеның 2 нче көнендә (28 сентябрьдә), Татарстан мөфтие урынбасары, ТР мөселманнары Диния нәзарәтенең «Хозур» нәшрият йорты җитәкчесе Ришат Хәмидуллин Россия Федерациясендә (Казан шәһәре) Бөтендөнья мирасын саклау Конвенциясенең 50 еллыгына халыкара форум үткәрүгә багышланган киңәшмәдә катнашты. Киңәшмә Татарстан Республикасы Министрлар Кабинетында ТР Премьер-министры урынбасары – Татарстан Республикасы Министрлар Кабинеты Аппараты җитәкчесе, Татарстан Республикасының ЮНЕСКО эшләре буенча комиссиясе рәисе Шамил Гафаров рәислегендә Россия Федерациясе Комиссиясенең ЮНЕСКО эшләре буенча җаваплы секретаре, Россия Федерациясе Тышкы эшләр министры киңәшчесе Григорий Орджоникидзе катнашында узды.
Григорий Орджоникидзе Россия Федерациясендә Бөтендөнья мирасын саклау Конвенциясенең 50 еллыгына багышланган халыкара форум үткәрүгә канылышлы көнүзәк мәсьәләләр турында чыгыш ясады.
Татарстан Республикасының Бөтендөнья мирасын саклау Конвенциясенең 50 еллыгына багышланган халыкара форум үткәрүгә әзерлек барышы белән Татарстан Республикасы мәдәният министры Ирада Әюпова таныштырды.
