Бүген, Рабигыль-әүвәл аеның 4нче көнендә (30нчы сентябрьдә), Татарстан Республикасы мөфтие Камил хәзрәт Сәмигуллин “Казан Экспо” халыкара күргәзмә үзәге базасында оештырылган мобилизацияләнгән солдатларны җыю пунктын барып күрде. Солдатлар белән очрашуда шулай ук мөфтинең беренче урынбасары Илфар хәзрәт Хәсәнов, Нәзарәтнең Аппарат җитәкчесе Ирек Арсланов, хәрбиләр, мобилизация өчен җаваплы затлар һ.б. катнашты.
Камил хәзрәт Сәмигуллин хәрби хезмәткә чакырылган дин кардәшләр һәм имамнар белән аралашты. Аларның дини сорауларына җавап бирде, нәсыйхәтләр әйтте.
Аннары җитәкчеләр “Казан Экспо” базасында мөселманнар һәм христианнар өчен оештырылган гыйбадәт бүлмәләрен карады. Биредә тәһарәт алу, намаз уку, дога кылу өчен шартлар тудырылган. Камил хәзрәт намаз уку бүлмәсен дини китаплар, догалыклар белән баетырга дигән тәкъдим җиткерде. Моннан тыш, махсус хәрби операциядә катнашучы Татарстан Республикасы сугышчыларының һәрберсенә махсус әзерләп бастырылган дога китапларын биреп җибәрү көтелә. Догалыклар уңайлы шрифтта һәм һәрвакыт үзең белән кесәдә йөртерлек форматта булачак.
Солдатлар белән аралашу барышында мөфти хәзрәт бүгенге көндә “Зәкят” хәйрия фонды тарафыннан мобилизацияләнгән Татарстан солдатларына хәләл ризык, термокием, аптечкалар сатып алып җибәрү өчен акча җыелуы хакында белдерде. Акча җыю дәвам итә. Теләгән һәр кеше “Зәкят” фондына мөрәҗәгать итә ала.
