Бүген, Рабигыль-әүвәл аеның 14нче көнендә (10нчы октябрьдә), Татарстан мөфтиятендә мөхтәрәм кунак – татарларның төбәк милли-мәдәни автономиясе җитәкчесе, Иваново өлкәсе мөселманнары Диния нәзарәте рәисе Фәрит хәзрәт Ляпин булды. Аны Татарстан мөфтие Камил хәзрәт Сәмигуллин каршы алды. Очрашуда шулай ук “Мөхәммәдия” мәдрәсәсе директорының беренче урынбасары Рөстәм хәзрәт Хәйруллин катнашты.
Җитәкчеләр әңгәмә барышында үзләренең соңгы казанышлары хакында сөйләштеләр. Фәрит хәзрәт Ивановода татар милли-мәдәни үзәген төзү барышы белән таныштырды. Ул киләсе елга үз ишекләрен ачар дип көтелә. Биредә татар тарихы музее, уку класслары, хәләл кафе һәм мөселман кибетләре урын алачак. Мөхтәрәм кунак, әлеге вакыйга уңаеннан, алдан ук Камил хәзрәтне ачылыш тантанасына чакырып куйды. Моннан тыш, ул төбәктәге дини эшчәнлек үсеше белән таныштырды.
Камил хәзрәт, үз чиратында, аңа Татарстан мөфтиятенең яңа башлангычлары, аерым алганда, татар мәкамен торгызу проекты, рус телендә онлайн-мәдрәсә, татар телен өйрәнү буенча онлайн-платформа, шулай ук Татарстаннан мобилизацияләнгән солдатларга ярдәм итү турында сөйләп узды.
