Казан шәһәрендә урнашкан “Хәләл Бәхетле” кибетенең хәләл сертификацияләү турында таныклыгының гамәлдә булу вакыты чыкты. Шул сәбәпле, Габдулла Тукай урамы, 64нче йорт адресы буенча урнашкан әлеге сәүдә ноктасына хәләл булмаган чимал кертелергә мөмкин. Бу хакта Татарстан мөфтиятенең “Хәләл” стандарт комитеты хәбәр итә. Хәзерге вакытта Татарстан Комитеты белгечләре әлеге кибеткә сатуга куелучы ашамлыкларны тикшерүне алып бармый һәм “Бәхетле-1” ҖЧҖ җитештергән азык-төлекнең хәләллеге өчен җавап бирми.
Таныклыкның гамәлдә булу вакыты чыкканнан соң, Комитет супермаркет фасадыннан “хәләл” тамгасы төшерелгән язуны алырга сорап хат юллады. Контролерлар 3 ай дәвамында супермаркет товарлары ассортименты аудитын уздырдылар. Өч ай узганнан соң “Бәхетле-1”дән таныклыкны озайту турында гариза кермәде. Шуңа бәйле рәвештә Комитет контролерлары бүтән әлеге сәүдә ноктасы товарларын тикшерү белән шөгыльләнми.
“Хәләл” стандарт комитеты әлеге кибеттән азык-төлек сатып алганда игътибарлы булырга, хәләл тамгасы булмаган ашамлыклыкларның составын өйрәнергә чакыра.
