Рабигыль-ахир аеның 4нче көнендә (30нчы октябрьдә), Буа шәһәренең “Госман” мәчетендә районкүләм дога бәйгесе булып узды.
Бәйгегә Буа мөхтәсибәте мәчетләреннән 50гә якын бала көч сынашырга килде. Бәйгене Буа мәдрәсәсе мөгаллиме Ильяз хәзрәт Сабиров Коръән аятләре белән башлап җибәрде. Буа имам-мөхтәсибе Илмир хәзрәт Хәсәнов шәкертләргә уңышлар теләде.
“Дога бәйгесе”ндә сабыйларның чыгышларын бәяләү өчен районның Асакаллар рәисе, Килдураз авылы имам-хатыйбы – Кадим хәзрәт Мөбарәкшин, Түбән Наратбаш имамы – Рөстәм хәзрәт Баһаутдинов, Бикмураз авылы имамы – Илдус хәзрәт Асадуллин, шәкертләрне кием ягыннан бәяләү өчен – Марат хәзрәт Хәйбуллин катнашты. Шәкертләр теркәлү узгач, үзләре өйрәнеп килгән догаларны сөйли башлады.
Жюри доганың эчтәлегенә, стилистик яңгырашына бәя биреп торды.
Бәйге ахырында урыннар билгеләнде.
1нче урында Вәлиуллина Илүзә, Игамбердиев Ибраһим.
2нче урында Гайнуллин Тәүфикъ, Фәйзуллина Камилә.
3нче урында Хәйбуллина Сөмбел, Хисаметдинов Ислам, Шакүров Камил.
“Матур кием” номинациясендә – Исхакова Әдилә.
Иң яшь катнашучылар – Камаретдинова Азалия, Хәйбуллина Мәликә булды.
Барлык катнашкан шәкертләргә мөхтәсибәт тарафыннан акчалата бүләк һәм мактау кәгазьләре, “Госман” мәчете исеменнән бүләкләр тапшырылды. Мәҗлес ахырында катнашучыларга, аларның әти-әниләренә мәчеттә мул табын әзерләнде.
Оештыручыларга: Буа мөхтәсибәтенә, Илмир хәзрәткә, бәя биреп утыручы хәзрәтләргә, “Госман” мәхәлләсе имамы – Илсур хәзрәткә һәм аның күл астында эшләүчеләргә, Буа һәм авыл имамнарына мөхтәсибәт исеменнән зур рәхмәтләребезне белдерәбез. Дога бәйгесе дәвамлы булсын!
