Татарстан мөфтиятенең “Зәкят” хәйрия фонды Казанның 4 вакытлыча урнашу урынында яшәүче Донецк һәм Луганск качакларына гуманитар ярдәм күрсәтте. Бүген 301 кеше шәхси гигиена һәм көнкүреш химиясе җыелмалары – сабын, теш пастасы, теш щеткасы, шампунь, кер юу порошогы алды. Ярдәм күрсәтү Президент грантлары фонды булышлыгы белән тормышка ашырылды.
“Зәкят” фонды качаклар килеп урнашкан Татарстандагы барлык 8 вакытлыча урнашу пунктларын колачларга ниятли – анда бүген 600дән артык кеше яши.
Исегезгә төшерәбез, “Зәкят” хәйрия фонды 2022нче елның апрель аенда 462 качакка шәхси гигиена һәм көнкүреш химиясе җыелмалары тапшырып хәйрия ярдәме күрсәтте.
Ә 2022нче елның августында Нәзарәтнең “Зәкят” хәйрия фонды өстәмә рәвештә качакларның балаларына – 167 укучыга букчалар һәм мәктәп кирәк-яраклары тапшырды.
