Шәгъбан аеның 1нче көнендә (21нче февральдә), Мәскәүдә “Православие-Ислам” диалогы буенча Россия-Иран уртак комиссиясенең пандемиядән соң җәмгыятьнең дини бергәлекне ныгыту мәсьәләләренә багышланган XII утырышы узды. Мөфти Камил хәзрәт Сәмигуллин һәм аның беренче урынбасары Илфар хәзрәт Хәсәнов әлеге очрашуда катнашты, ул Татарстанның Мәскәүдәге Тулы вәкаләтле вәкиллегендә узды.
Мөхтәрәм кунаклардан Иран Ислам Республикасының мәдәният һәм ислам элемтәләре оешмасы, Дини сәясәт һәм динара диалогны җайга салу советы рәисе Мөхәммәд Мәһди Иманипур, Иран Ислам Республикасының Россия Федерациясендәге илчесе Казем Җәләли, Иранның Россиядәге Илчелеге каршындагы мәдәни вәкиллек башлыгы Масуд Әхмәдванд һәм башкалар бар иде.
“Татарстан – төрле дин вәкилләренең тату яшәвенең матур үрнәге”, – дип билгеләп үтте Мөхәммәд Мәһди Иманипур һәм Иранда “Россия – Ислам дөньясы” стратегик караш төркеме утырышын үткәрергә тәкъдим итте.
