Рамазан аеның 6нчы көнендә (28нче мартта), III Халыкара “Татар сүзе” бәйгесе җиңүчеләре билгеле булды һәм Казанның “Сәйдәш” мәдәният үзәгендә бүләкләү тантанасы үткәрелде. Быелгы конкурсны Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе белән бергәлектә “Яңа Гасыр” телерадиокомпаниясе оештырды.
Конкурска Татарстанның төрле районнарыннан, Россиянең төрле төбәкләреннән 3200 кешедән гариза кабул ителгән. Шуларның утызы җиңүче исеменә лаек дип табылды. Җиңүчеләр “Шигърият”, “Проза”, “Үзем язган шигырь”, “Үзем язган әсәр” номинацияләре буенча игълан ителде. Бәйге нәтиҗәләре буенча, Әлмәт шәһәре һәм районы имам-мөхтәсибенең социаль мәсьәләләр буенча урынбасары Ихсанов Рүзил Марат улы 18 яшь һәм өлкәнрәкләр арасында “Шигърият” номинациясендә I урынга лаек булды һәм диплом белән бүләкләнде.
Җиңүчеләрне бүләкләү тантанасында Татарстан Республикасы Дәүләт Советы Рәисе урынбасары, Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе рәисе Марат Әхмәтов дипломнар тапшырды.
