РФ Мөселман эшкуарлары ассоциациясенең Хәйрия фонды Курган өлкәсенең Йолдыз (Эчкен) авылын төзекләндерү өчен матди ярдәм күрсәтте. Ассоциация президенты Айдар Шаһимәрданов, Бөтендөнья татар конгрессының Казандагы штаб-фатирында булып, 350 мең сумнан артык хәйрия акчасын тапшыру турында килешүне имзалады. “Кардәшләребезгә бәхетсезлек килүгә бик борчылабыз, бу бөтен халкыбыз фаҗигасе”, - диде Айдар Шаһимәрданов, алга таба да ярдәм итәчәкләрен белдереп.
Бөтендөнья татар конгрессы башкарма комитеты рәисе Данис Шакиров, үз чиратында, Ассоциациянең ярдәмгә беренчеләрдән булып килүен әйтте. “Үз исемемнән, татар конгрессы һәм Курган өлкәсендә яшәүче барлык татарлар исемемнән ярдәмегез өчен рәхмәт белдерәм. Игелекле эшләрегез үзегезгә меңе белән әйләнеп кайтсын”, - диде ул.
Билгеле булганча, 8 майда Курган өлкәсендәге бу татар авылы тулысынча янып бетте. Мәчет, берничә йорт, мәктәп һәм мәдәният йорты гына калды. Бүген зыян күрүчеләргә тиз арада авылны яңадан торгызырга кирәк.
