Бүген, зөлхиҗҗә аеның 10нчы көнендә, Корбан бәйрәме көнне, Татарстан хаҗилары иртәнге намазны Мөздалифә үзәнлегендә укыды, ә аннары Минага палата шәһәрчегенә кайтты. Алар исеменнән корбан чалуны оештыручы махсус фирмалар корбан чалачак, корбан итләрен Согуд Гарәбстаны һәм аның янында яшәүче мохтаҗларга таратачак.
Хаҗилар бүген шулай ук Җәмаратка барып ташлар атачак.
Хаҗилар ихрам халәтеннән чыгачаклар һәм көндәлек киемнәрен киячәк. Алдагы өч көндә хаҗилар тәваф зийара кылачак, Сафа һәм Мәрва арасын йөгереп узачак. Кәгъбә тирәли әйләнү хаҗның фарызы булып тора. Аннары хаҗилар янәдән Минага кайтачак.
