Бүген, зөлхиҗҗә аеның 20нче көнендә (8нче июльдә), Татарстан мөфтие Камил хәзрәт Сәмигуллин Түбән Новгород шәһәренә эш сәфәре белән килде. Биредә ул РФ мөселманнары Диния нәзарәте рәисе, мөфти шәйх Равил Гайнетдин белән очрашу үткәрде һәм Түбән Новгород өлкәсе мөселманнары Диния нәзарәтенең 30 еллыгы, Хөсәин Фәезхановның тууына 200 ел тулу уңаеннан тантаналы кабул итүдә катнашты.
Татарстан мөфтие Равил Гайнетдингә кунакчыллык өчен рәхмәтен җиткерде, аннары алар истәлекле бүләкләр алышты.
Очрашуда шулай ук Татарстан мөфтиенең беренче урынбасары Илфар хәзрәт Хәсәнов, РФ мөселманнары Диния нәзарәте рәисенең беренче урынбасары, Мәскәү ислам институты ректоры, профессор Дамир Мөхетдинов, РФ мөселманнары Диния нәзарәте рәисе урынбасары Рушан Аббясов һәм башкалар бар иде.
Билгеле булганча, 7-9нчы июль көннәрендә Нижгар өлкәсендә күренекле татар галиме Хөсәин Фәизхановның тууына 200 ел тулуга багышланган чаралар уза: галим җирләнгән Сафаҗай авылы зиратында мемориал ачылды, Түбән Новгород мөселманнары Диния нәзарәтенең VIII съезды узды, Ярминкә мәчете төзеләчәк урынга истәлек ташын урнаштыру тантанасы көтелә һәм I Идел буе Сабан туе узачак.
