Бүген, Мөхәррам аеның 8нче көнендә (26нчы июльдә), Татарстан мөфтие Камил хәзрәт Сәмигуллин “Кол Шәриф” мәчетендә Сенегал Республикасы Президенты Маки Саллны каршы алды. Сенегалдан килгән дәрәҗәле кунаклар делегациясен Татарстан Рәисе Рөстәм Миңнеханов озата йөрде.
Камил хәзрәт кунакларга Россиядә һәм Татарстанда ислам үсеше тарихы, динара һәм милләтара татулык традицияләре һәм Татарстан мөфтияте эшчәнлеге турында сөйләде. Шулай ук ул аларны “Кол Шәриф” мәчете һәм аның архитектур үзенчәлекләре белән таныштырды, биредә тәүлек дәвамында Коръән укыла, дип билгеләп үтте.
Россия төбәкләренең берсе буларак, Маки Салл Сенегал белән Татарстан Республикасы арасындагы мөнәсәбәтләрне үстерү буенча эшне көчәйтергә җыенуын билгеләп үтте. “Татарстан – мөселман төбәге, – диде ул. – Мин 93-95% халкы мөселман булган илне җитәклим, безнең тотрыклы яшәү сере шулай ук толерантлыкта һәм башка диннәр белән тату яшәүдә. Сездә янәшә торган чиркәүләрне һәм мәчетләрне күрдем – бу үрнәк соклануга лаек, моны барлык илләр файдаланырга тиеш”.
ТР Рәисе матбугат хезмәте материаллары файдаланылды.
