Бүген, сафәр аеның 13нче көнендә (29нчы августта), Татарстан мөфтие Камил хәзрәт Сәмигуллин Казан Ратушасында узган II Казан Глобаль яшьләр саммитының пленар сессиясендә катнашты.
Ул утырышны Коръәннән аятьләр укып ачып җибәрде.
Җыелышның төп темасы булып балалар һәм яшьләрне тәрбияләүдә традицион кыйммәтләрнең роле тора. “Дөнья тотрыксызлык чорына кергәндә, әлеге тема аеруча актуаль”, – дип билгеләп үтте Рөстәм Миңнеханов. Ул шулай ук искәрткәнчә: узган ел – Идел буе Болгар дәүләтендә Ислам дине кабул ителүнең 1100 еллыгында – Казан Ислам хезмәттәшлеге оешмасының Яшьләр башкаласы статусын алды. Мондый статус беренче тапкыр Ислам хезмәттәшлеге оешмасының күзәтүче иленә бирелде.
Рөстәм Миңнехановтан тыш, пленар утырышта Россия Президентының Идел буе федераль округындагы Тулы вәкаләтле вәкиле Игорь Комаров, Ислам хезмәттәшлеге оешмасы Яшьләр форумы президенты Таха Айхан, Бөтендөнья ислам оешмасының мәгариф, фән һәм мәдәният мәсьәләләре буенча генераль директоры (ИСЕСКО) Сәлим бин Мөхәммәд Әлмәлик, Росмолодежь җитәкчесе урынбасары Дамир Фәттахов, “Движение первых” Бөтенроссия балалар һәм яшьләр хәрәкәте идарәсе рәисе Григорий Гуров һ.б. бар иде.
ТР Рәисе матбугат хезмәте материаллары файдаланылды.
