Сафәр аеның 24нче көнендә (9нчы сентябрьдә) Тукай районы Әҗмәкәй авылы мәчетендә район мөхтәсибәтенең мәчет каршындагы курсларда белем бирүче абыстай-мөгаллимәләрнең җыелышы булып узды.
Җыелыш барышында укытучылар Тукай районының барлык мәчетләрендә хәнәфи мәзһәбенә һәм имам Әбу Мансур Әл-Матуриди гакыйдәсенә, Нәзарәт стандартларына туры килгән бердәм программа буенча укыту турында сүз алып барды, шулай ук алда торган проектлар һәм планнар буенча фикер алышу узды.
Әлеге чара мәчет каршындагы курсларда белем алучы яшь шәкертләрнең чыгышы белән башланды. Аннары абыстайлар укыту тәҗрибәсе буенча фикер алышты, ә Тукай мөхтәсибәтенең мәгариф бүлеге җитәкчесе Фәридә Шәрипова уку-укыту бүлегенең узган елдагы эшчәнлеге буенча хисап ясады. Алга таба имам-мөхтәсиб Инсаф хәзрәт Сәүбәнов укытучылар алдында үгет-нәсыйхәт сүзләре белән чыгыш ясады һәм аларга зур хезмәтләре өчен рәхмәтен белдерде. Күп еллар мәчетләрдә намус белән эшләгән укытучыларга Инсаф хәзрәт рәхмәт хатлары тапшырды. Шулай ук аның кулыннан хатын-кызлар арасында Коръән бәйгесендә җиңүчеләр грамоталар алды. Җыелыш дога кылу һәм төшке аш белән тәмамланды.
