Бүген, Рабигыль-әүвәл аеның 20 нче көнендә (5 октябрь), Татарстан Республикасына эш сәфәре белән Үзбәкстан Республикасы Президенты Шәүкәт Мирзиёев килде. Эш сәфәре Россия Федерациясенә рәсми сәфәр кысаларында уза.
Үзбәкстан Республикасы Президенты Шәүкәт Мирзиёев Татарстанда вакытта «Казан Кремле» музей-тыюлыгының тарихи объектларында булды. Татарстан Рәисе Рөстәм Миңнеханов һәм башка рәсми затлар белән бергә Шәүкәт Мирзиёев Кол-Шәриф мәчетен карады һәм әлеге объектның барлыкка килү тарихы белән танышты. Мәчет янында кунакны Татарстан Мөфтие, ТР мөселманнары Диния нәзарәте рәисе Камил хәзрәт Сәмигуллин каршы алды. Ул кунакка Коръәннең яңартылган “Казан басмасы”н бүләк итте.
Фотографияләр – ТР Рәисенең матбугат хезмәте.
