Бүген, Рабигыль-әүвәл аеның 21нче көнендә (6нчы октябрьдә), Татарстан мөфтие Камил хәзрәт Сәмигуллин Нәзарәттә РФ Президентының Эчке сәясәт буенча идарәсенең Дини оешмалар белән хезмәттәшлек буенча департаменты киңәшчесе Абдул-Хәким Султыговны кабул итте. Очрашуда шулай ук Мөфтинең мәгълүмати сәясәт буенча урынбасары, “Хозур” нәшрият йорты җитәкчесе Ришат Хәмидуллин, Болгар ислам академиясенең мәгариф эшчәнлеге буенча проректоры Рөстәм Гыйльметдинов катнашты.
Абдул-Хәким Султыгов берничә көн эчендә Буа мәдрәсәсендә, Ислам динен кабул итүгә 1000 ел исемендәге мәдрәсәдә булырга өлгерде, мөселман уку йортларының эшчәнлеге белән танышты. Мисал өчен, Буада ул шәкертләр белән әңгәмә үткәрде, мәдрәсә биналарының яңа комплексын, тәхфиз үзәген карады.
Очрашу барышында мөселман мәгарифен үстерү, дини кадрлар әзерләү, Болгар ислам академиясе белән хезмәттәшлек алып бару мәсьәләләре каралды. Абдул-Хәким Султыгов мөселман мәдрәсәләренә сәфәрләреннән тәэсирләре белән уртаклашты. Мөхтәрәм кунак шулай ук Галиев мәчетендә җомга намазында катнашты.
