Бүген, Рабигыль-ахыр аеның 3нче көнендә (18нче октябрьдә), Каһирәдә Мисыр Президенты Абдел Фәттах ас-Сиси тарафыннан үткәрелүче “Фәтвалар һәм өченче меңьеллыкның көн таләпләре” Халыкара конференциясе ачылды. Фәнни форум эшендә Татарстан мөфтие Камил хәзрәт Сәмигуллин, шулай ук төрле илләрдән халыкара ислам җәмәгатьчелегенең күренекле вәкилләре катнаша.
Конференция хәзерге кешелек проблемаларын хәл итүдә теологик фәтваларның институциональ ролен билгеләү максатыннан үткәрелә. Җыелышта катнашучылар Өченче меңьеллыкта өммәт алдында торган иң җитди проблемаларны билгеләячәкләр һәм аларны дин белеме, әхлакый һәм интеллектуаль кыйммәтләрне ныгыту, конфессияара тынычлык һәм татулык, сәламәтлек саклау, икътисад һ.б. өлкәләрдә хәл итү юлларын тәкъдим итәчәкләр.
Конференциянең беренче көне Газәдәге хастаханәне утка тоту һәм андагы гражданнарны юк итү белән бәйле рәвештә Фәләстыйн халкына карата кайгы уртаклашудан башланды. Шунысын да билгеләп үтәргә кирәк, конференциядә катнашучылар арасында Фәләстыйн казые Мәхмүд Хаббаш та бар.
