Бүген, Рабигыль-ахыр аеның 8нче көнендә (23нче октябрьдә), Сан-Паулуга эш сәфәре кысаларында Татарстан мөфтие Камил хәзрәт Сәмигуллин Бразилиядә Имамнар һәм ислам эшләре буенча Югары совет башлыгы шәйх Халед Тәкый Әл-Дин белән очрашты.
Очрашу Бразилия мөселманнары эшчәнлеге белән таныштыру характерында булды, ә үз чиратында Камил хәзрәт мөфтиятнең эшчәнлеге турында сөйләде.
Шулай ук сүз хәләл һәм мәгариф өлкәсендә үзара хезмәттәшлек турында барды.
Камил хәзрәт Бразилиянең Имамнар һәм ислам эшләре буенча Югары советы башлыгы шәйх Халед Тәкый Әл-Дингә очрашу истәлеге итеп репринт “Казан басма”сын тапшырды. “Казан басма” тарихи нөсхәсе ТР мөселманнары Диния нәзарәтенең “Хозур” нәшрият йорты тарафыннан Идел буе Болгар дәүләтендә ислам динен кабул итүгә 1100 ел тулуга багышланган тантана кунакларына тапшыру өчен бастырылды.
Исегезгә төшерәбез, бу көннәрдә Татарстан Мөфтие Камил хәзрәт Сәмигуллин җитәкчелегендәге ТР мөселманнары Диния нәзарәте делегациясе Бразилиядә хәләл Глобаль бизнес-форумда катнаша.
