Бүген, Рабигыль-ахыр аеның 17 нче көнендә (1 ноябрьдә), Россия ислам институтында философия фәннәре докторы Али Вячеслав Полосинның «Политический ислам: в поисках «земного рая» китабы тәкъдим ителде.
Әлеге чара «Бүгенге ислам – сәясәт һәм традиция арасында» дигән түгәрәк өстәл кысаларында узды. Анда автор, Ислам мәдәнияте, фәне һәм мәгарифкә ярдәм итү фонды директоры урынбасары, Болгар ислам академиясенең теология кафедрасы профессоры, философия фәннәре докторы Али Вячеслав Полосин; Татарстан Мөфтиенең мәгариф буенча урынбасары, РИИ һәм КИУ ректоры, басманың рецензенты Рәфикъ Мөхәммәтшин; Татарстан Республикасы Фәннәр академиясенең Ислам белеме тикшеренүләре үзәге директоры, сәяси фәннәр кандидаты Ринат Патеев; Кыргыз Республикасы Тышкы эшләр министрлыгының Дипломатик академия профессоры вазифаларын башкаручы Кадыйр Маликов; Уфа фән һәм технологияләр университетының Гуманитар һәм социаль фәннәр институтының философия һәм социология югары мәктәбенең философия һәм культурология кафедрасы доценты Диләрә Акбашева һәм башкалар катнашты.
Фәнни монография 100 ел элек барлыкка килгән сәяси ислам кебек иҗтимагый-дини күренешкә багышланган. Китап сәяси исламны дин фәлсәфәсе, политология, аналитик психология, теология күзлегеннән тулаем бер тикшеренү булып тора. Автор сүзләренчә, мондый комплекслы алым проблеманы системалы рәвештә, төрле яктан карарга мөмкинлек бирә.
