Буа шәһәренең “Хаҗилар” мәчетендә район хаҗиларының очрашуы булып узды. Әлеге чарада Татарстанның “ДУМ РТ Хаҗ” рәсми хаҗ операторы җитәкчесе урынбасары Азат Хөрмәтуллин, Буа имам-мөхтәсибе Илмир хәзрәт Хәсәнов, “Хаҗилар” мәчете имам-хатыйбы Фәһим хәзрәт Сөләйманов, Буа районыннан төрле елларда изге сәфәрдә булып кайткан хаҗилар катнашты.
Мөселман кешесе тормышында иң зур гыйбадәтләрнең берсе – хаҗ гамәлен үтәп кайтучылар бер-берсенең хәл-әхвәлләрен белеште, изге сәфәрдән хис-кичерешләрен күңелендә яңартты.
Әлеге чараның кульминациясе – быел Рамазан-шәриф аенда игълан ителгән “Мөселман кардәшебезне гомрәгә җибәрик” проектына нәтиҗә ясау булды. Бәйгене Буа мөхтәсибәте һәм Буа мәдрәсәсе оештырды: шәһәрнең халык иң күп йөри торган урыннарына махсус ящиклар урнаштырылды. Бер кешене гомрәгә җибәрү өчен җитәрлек сумма тупланды. Оештыручылар Буа мәдрәсәсенең яхшы укучы һәм әдәп-әхлагы камил булган шәкертне гомрәгә җибәрү карарына килде. Җиңүче булып көндезге бүлектә II курста белем алучы Ибраһим Тимаев танылды. Аңа “ДУМ РТ Хаҗ” оешмасы вәкиле һәм имам-мөхтәсиб гомрәгә сертификат тапшырды.
