23-24 ноябрьдә Томск шәһәрендә православие һәм мөселманнар диалогына багышланган «Себер – диалог территориясе» халыкара форум узды. Конференциянең пленар утырышы Томск дәүләт университетының фәнни китапханәсенең зур залында үтте.
Әлеге чарада Нәзарәтне Татарстан Мөфтие Камил хәзрәт Сәмигуллин йөкләмәсе буенча аның халыкара мәсьәләләр буенча киңәшчесе Салих хәзрәт Ибраһимов тәкъдим итте. Ул, Камил хәзрәт Сәмигуллин исеменнән сәламләп, Татарстанда милләтара һәм динара мөнәсәбәтләр тәҗрибәсе турында сөйләде һәм Нәзарәт проектлары белән таныштырды. Салих хәзрәт шулай ук «Ислам һәм православиенең хезмәттәшлек тарихы» секциясендә «Ислам һәм православие: динара коммуникацияләрнең уңышлы практикалары» темасына чыгыш ясады.
Форумның төп максаты – ислам һәм православиенең хезмәттәшлеген һәм үзара бәйләнешен тирәнтен һәм һәрьяклап үстерү темасын ныгыту һәм үстерү; традицион кыйммәтләрне саклау буенча уртак тырышлыкны күрсәтү; дөньядагы җимергеч көчләргә каршы торуның нәтиҗәле механизмнарын эшләү; хәзерге заман таләпләренә һәм янауларына бергәләп җавап бирү.
Чарада Томск өлкәсе губернаторы Владимир Мазур һәм Томск мэры Дмитрий Махиня, РФ Президентының Себер федераль округындагы тулы вәкаләтле вәкиле урынбасары Дмитрий Колозин, Россия мөселманнары Диния нәзарәте җитәкчесе, Мәскәү шәһәре мөфтие, Россия Иҗтимагый палатасы әгъзасы Әлбир хәзрәт Крганов, Томск һәм Асиновск митрополиты Ростислав, Томск өлкәсе Закон чыгару думасы рәисе Оксана Козловская, хакимият органнары, төрле дин әһелләре, дистәдән артык илдән галимнәр һәм экспертлар катнашты.
