23-25 ноябрьдә Истанбулда 9 нчы Бөтендөнья хәләл саммиты һәм Halal Expo 2023 узды. Әлеге чарада Татарстан Мөфтие Камил хәзрәт Сәмигуллин җитәкчелегендәге Татарстан Республикасы делегациясе катнашты. Анда шулай ук ТР мөселманнары Диния нәзарәтенең «Хәләл» стандарты комитеты рәисе Аббяс хәзрәт Шляпошников, шулай ук комитет күзәтчелегендәге берничә предприятие вәкиле керде.
25 ноябрьдә Камил хәзрәт Сәмигуллин пленар утырышны Коръән укып ачып җибәрде. Саммит кысаларында Аббяс хәзрәт Шляпошников хәләл индустрия вәкилләре белән берничә эшлекле очрашу үткәрде. ТР мөселманнары Диния нәзарәтенең «Хәләл» стандарты комитеты стенды күргәзмәгә килүчеләрне комитет эшчәнлеге һәм хәләл продукция җитештерүчеләр белән таныштырды. Алар арасында «Русский Мрамор», «Касымовский», «ЕЛМАЙ», «Акульчев» һәм башка ширкәтләр бар.
Бөтендөнья хәләл саммиты дөньядагы иң зур чара булып исәпләнә – анда хәләл өлкә белән бәйле соңгы вакыйгалар һәм яңалыклар яктыртыла. Саммитны Ислам илләренең стандартлар һәм метрология институты белән берлектә Төркиянең халыкара күргәзмәләр оештыру ассоциациясе оештырды. Нәзарәтнең «Хәләл» стандарты комитеты әлеге институт белән хезмәттәшлек итә.
