Бүген, җөмәдәл-әүвәл аеның 22нче көнендә (6нчы декабрьдә), Казанда “Ярдәм” мәчете чатырында физик мөмкинлекләре чикле кешеләр өчен хәйрия мәҗлесе узды. Ул инвалидлар декадасы кысаларында үткәрелде. Әлеге чарада 123 инвалид катнашты. Алар арасында Россиянең 6 төбәгеннән, БДБның 4 иленнән “Ярдәм” мәчетенә тернәкләндерү курсларына укырга килүчеләр дә бар иде.
Хәйрия ашына күрмәүче, ишетмәүче, инвалид коляскасындагы кешеләр, терәк-хәрәкәт аппараты авырулары, ДЦП диагнозы булган инвалидлар чакырулы иде. Әлеге чарада “Ярдәм” гомуммилли хәйрия фонды президенты Илһам хәзрәт Исмәгыйлев, “Ярдәм” тернәкләндерү үзәге директоры Мәликә Гыйльметдинова, Бөтенроссия сукырлар җәмгыятенең Казан оешмасы рәисе Алсу Ибраһимова, Татарстанның ишетмәүчеләр җәмгыяте рәисе Венера Гаулстон һ.б. катнашты.
Хәйрия ашында кунаклар өчен “Сәламәтлеге чикле батырлар” фильмы күрсәтелде. Ул Мөфтинең киңәшчесе Илдар хәзрәт Баязитовның хәер-фатыйхасы белән “Ярдәм” фонды иҗат төркеме тарафыннан төшерелде.
