Бу көннәрдә Казанга эш сәфәре белән Дубайдан дөньякүләм танылган мөселман галиме, дин әһеле, Изге Коръән Дубай халыкара премиясе (DIHQA) Коръән әзерләү комиссиясе башлыгы, хафизлыкның иң югары дәрәҗәсенә ия булган, пәйгамбәребез Мөхәммәднең ﷺ нәсел дәвамчысы шәех Мәэмүн әр-Рави килде. Аның сәфәренең төп максаты Татарстан мөфтияте проекты – Коръәннең кулъязма Мүсхәфен әзерләп чыгару комиссиясе утырышында катнашудан гыйбарәт.
Мәэмүн әр-Рави үзенең эш сәфәрен Казанның “Мөхәммәдия” мәдрәсәсе шәкертләре белән очрашудан башлады. Очрашуда көндезге бүлектә белем алучы 1-5 курс студентлары, укытучылар – барлыгы 200гә якын кеше катнашты. Танылган галим илебезнең иң мәшһүр һәм борынгы дини уку йортларының берсендә белем алучыларга үгет-нәсыйхәт сүзләрен җиткерде, вакытның кадерен белеп мөмкин кадәр күбрәк файдалы белемнәр үзләштерергә чакырды һәм алган гыйлемнәр белән өммәткә хезмәт итүдә уңышлар теләде.
Шәех гыйлем алу юлына басучыларга Аллаһы Тәгалә җәннәт юлын җиңеләйтәчәге турында искә төшерде, ислам динендә белем алуның фазыйләтләре турында аңлатты. Ул шәкертләрне шайтан вәсвәсәсенә иярмәскә, дәресләрне игътибар белән тыңларга, һәр яктан үрнәк булырга өндәде. Мәдрәсә шәкертләре Коръән ятлау, кыйраәтләрне өйрәнү, кулъязма Коръәннәр әзерләү тәҗрибәсе һ.б. буенча бай мәгълүмат алды һәм үзләренең кызыксындырган сорауларын бирде.
Хәзерге вакытта көндезге бүлектә барлыгы 290 шәкерт белем ала. Шәкертләр өчен барлык уңайлыклар тудырылган: бай китапханә, спорт залы, тәһарәтханәләр, уку залы һ.б. бар. 1993нче елдан алып бүгенге көнгә кадәр мәдрәсәне тәмамлап, 2000нән артык кеше диплом алган.
