19 сентябрь көнне Яңа Чишмә районы Тубылгы Тау авылында район күләмендәге Корбан мәҗлесе узды. Изге мәҗлес мәдрәсә бинасында үткәрелде. Чарада Татарстан Республикасы мөселманнары Диния нәзарәтенең дәгъвәт бүлеге җитәкчесе Нияз хәзрәт Сабиров, Яңа Чишмә районы имам-мөхтәсибе Илгиз хәзрәт Әшрапов, Аксубай районы имам-мөхтәсибе, төбәк казые Равил хәзрәт Зөфәров, Яңа Чишмә районы башкарма комитеты җитәкчесе Ринат Фәсахов, район имамнары, остазбикәләр, эшмәкәрләр һ. б. катнашты. Нияз хәзрәт Сабиров Татарстан мөфтие исеменнән сәлам сүзләрен җиткерде, доганың шартлары турында вәгазь сөйләде, район башлыгына һәм мөхтәсибкә бүләкләр бирде. Мәҗлестә күркәм мөнәҗәтләр әйтелде. Мондый мәҗлес ел саен үткәрелә, ул күркәм традициягә әйләнде.
