“Коръәннең яңа бастырылган Казан басмасы уку өчен бик уңайлы икән, Аны бастыручыларга Аллаһының рәхмәте булсын. Минем зур теләгем һәм үтенечем: яңа басма Коръәнне үземдә булдырырга миңа ярдәм итсәгез иде”.
Чаллыдан төзелеш ветераны, актив җәмәгать эшлеклесе Разия апа Әрифҗанова мөфти Камил хәзрәт Сәмигуллинга шундый мөрәҗәгать белән хат юллаган була. Татарстан мөфтие ветеранның үтенечен шундук канәгатьләндерә – аңа бүләк итеп Коръән китабын җибәрә. Шушы көннәрдә Чаллы мөхтәсибәтендә мөфти бүләген иясенә тапшыру тантанасы узды. Әманәт итеп җиткерелгән бүләкне Чаллы мөхтәсибәтенең яшьләр белән эшләү бүлеге җитәкчесе урынбасары Руфат Насрединов тапшырды.
