14 мартта Вольнистан авылы мәчетендә Буа районы мөхтәсибәте вәкилләре катнашында вәгазь кичәсе үтте. Авыл халкын хәзрәтләрнең Ислам дине турында файдалы мәгълүматын тыңлады. Буаның булачак 8 нче мәхәлләсе имамы Шамил хәзрәт Вәлиуллин дин кардәшләргә Буа мәдрәсәсенең мөдире, мөхтәсиб Илмир хәзрәт Хәсәновның сәламнәрен җиткерде һәм Ислам диненең биш баганасы турында тәфсилләп сөйләде. Госман мәчетенең икенче имамы Ринат хәзрәт Ибраһимов үзенең чыгышында фикх мәсьәләләрен кузгатты. Аеруча, ул намаз укылмый торган вакытлар турында аңлатып үтте. Вольнистан авылы имамы Рәкыйб хәзрәт Камалетдинов килгән кунакларга үзенең мәхәлләсе исеменнән рәхмәтләрен җиткерде.
