21 август көнне өйлә намазыннан соң Бикмураз мәчете бинасы янында авыл халкы мәхәллә картлары белән корбан ашы уздырды.
Мәҗлесне авыл имамы Әсадуллин Илдус хәзрәт башлап җибәрде. Ул авыл халкын корбан гаете белән котлады, мәҗлескә ярдәм иткән иганәчеләргә рәхмәт сүзләрен ирештерде, алга таба үткәреләчәк чаралар белән таныштырды. Яңа төзелеп килә торган мәчет мәхәлләсе әһеле Зөфәр Фатих улы үз чыгышында Бикмуразлыларны бәйрәм белән котлады, мөхтәсиб Илмир хәзрәт исеменнән тәбрикләү сүзләрен җиткерде. “Авылыгызда шундый мәчет бар, кадерен генә белеп яшәгез”, – диде ул. Авыл халкы ихластан үзләренең рәхмәт сүзләрен авыл имамы Илдус хәзрәткә җиткерделәр. Табын артында изге Коръән укылды, догалар кылынды.
