Җөмәдәл-әүвәл аеның унбишенче көнендә Чистай мөхтәсибәтенең атналык утырышы узды. Әлеге чарада имамнар һәм мөхтәсибәтнең барлык структураларыннан вәкилләр катнашты.
Чистай районы имам-мөхтәсибе Мөхәммәд хәзрәт Кыямов барлык катнашучыларны кыскача “ТР мөселманнары Диния нәзарәте имам-хатыйблары тарафыннан гыйбадәт кылулар һәм дини йолалар уздыру турында Нигезләмә” белән таныштырды, әлеге документ узган атнаны Болгарда узган пленумда кабул ителгән иде.
Алга таба Мөселман яшьләре берлеге җитәкчесе Радик Вафин мөхтәсибне һәм имамнарны яшьләр җыелышында узган тренинг белән таныштырды һәм киләчәктә балалар йорты буенча планлаштырылган проект турында сөйләде.
Җыелышта шулай ук Чистай муниципаль районы Советы аппараты җитәкчесе Равил Мәзгутов булды, ул хезмәткәрләр белән бергәлектә “Камалия” мәдрәсәсе буенча фикер алышты.
Әлеге чарада мөхтәсибәтнең башка структура вәкилләре дә хисап белән чыгыш ясады.
