29 май көнне Югары Ослан районы яшьләр үзәге бинасында мөселман активы өчен районкүләм ифтар мәҗлесе үткәрелде. 100 кешегә әзерләнгән мәҗлес затлы, зыялы, эчтәлекле булуы белән игътибарга лаек иде. Әлеге күркәм чара район администрациесе һәм мөхтәсибәте тарафыннан оештырылып, анда ТР мөселманнарының Диния нәзарәте вәкилләре, чакырылган кунаклар, район оешмалары җитәкчелеге, имамнар, Республика ифтарында катнашкан мөселман активы җыелды. Чара Корьән аятьләрен укып, дога кылу, Татарстан мөфтие киңәшчесе Равил хәзрәт Зөфәровның сәләмләү сүзе һәм бик үтемле вәгазе белән башланып, район җитәкчесе Марат Зыятдиновның, имам-мөхтәсиб Гали хәзрәтнең чыгышлары белән дәвам итте. Республикакүләм ифтар мәҗлесендә зур өлеш керткәннәре өчен 10 волонтерга мөхтәсибәт исеменнән Рәхмәт хатлары һәм бүләкләр тапшырылды. Азан яңгырап, авыз ачканнан соң, ир-егетләр дә, хатын-кызлар да намаз укыды.
