6 июнь көнне Буа районы Кайбыч авылы мәчетенә 25 ел тулу уңаеннан тантаналы чара узды. Чарада район имам-мөхтәсибе Илмир хәзрәт Хәсәнов, Буаның "Хаҗилар" мәчете имамы Фәһим хәзрәт Сөләйманов, Буа районының элеккеге район башлыгы Габделхай Нәбиулла улы, авыл имамы Назыйм хәзрәт Фәхретдинов катнашты. Башлап Назыйм хәзрәт кыскача мәчет тарихын сөйләп үтте. Илмир хәзрәт үзенең вәгазендә авыл нигезен саклап яшәргә, һәрдаим мәчеткә йөреп гамәл-гыйбадәт кылып тату, матур гына мәхәлләне әйдәп барырга икәнлегенә басым ясыды. 1994 елда эшләгән, мөхтәсиб вазыйфаларын башкарган Фәһим хәзрәт Сөләйманов мәчет төзегән вакыттагы уй-кичерешләре белән уртаклашты, мәхәлләгә, аның имамыма дәвамлылык теләде. Мөхтәсибебез Илмир хәзрәт бүгенге көндә мәхәлләгә булышып торучыларга мөхтәсибәт исеменнән рәхмәт хатлары, бүләкләр тапшырды. Авылны хөрмәт итеп кайтучы кунаклар үзләренең җылы тәбрик сүзләрен ирештерделәр. Кайбыч авылы үзидарәсе рәисе Габдрахманов Нияз Шакир улы килгән хәзрәтләргә авыл исеменнән рәхмәтен җиткерде.
Бәйрәм авыл мәдәният сараенда әзерләнгән мул табын артында дәвам итте.
